Teknologia

Partekatu

datos.gob.es plataformaren teknologia Open Source arkitekturan oinarritzen da, hainbat osagai uztartzen dituena proiektuaren behar funtzionalei aurre egiteko.

Batik bat, honako hauek dira datos.gob.es plataformaren osagaiak: edukiak kudeatzeko erreminta bat; modulu eleanitz bat, aukera ematen duena hizkuntza bakoitzean simetrikoki nabigatzeko; datuen katalogoaren kudeatzaile bat; erakunde argitaratzaileen datuen katalogoak osatzeko federazio-motor bat; Linked Data API soluzio bat eta SPARQL kontsulta-gune bat.

Arkitektura-diagrama

Jarraian goi-mailako arkitektura-diagrama bat ikus daiteke, bai eta geruza bakoitzari buruzko deskribapen laburra ere.

Alderantzizko proxy-a: Varnish-en bitartez, proiektuaren lau zerbitzuen bideraketa kudeatzen da: edukien ataria, datuen katalogoa, SPARQL kontsulta-gunea eta Linked Data API.
Edukien ataria: Drupal eduki-kudeatzailearen gainean garatua; proiektuaren argitaratze-edukia kudeatzen du.
Datuen katalogoa: CKAN aplikazioaren gainean ezarrita; metadatuen biltegi bakarra du; federatzailea osatzen du, erakunde argitaratzaile guztien katalogoekin sinkronizatzea ahalbidetzen duena.
Iraunkortasun-geruza: edukien atarirako eta datuen katalogorako datu-biltegia; MySQL eta PostgreSQL sistemetan ezarrita.
Indexazio-motorra: Apache Solr plataformaren gainean ezarrita; bilatzeko gaitasuna ematen die edukien atariari eta datuen katalogoari.
SPARQL kontsulta-gunea: OpenLink Software-ren Virtuoso delakoan ezarrita, RDF hirukoen biltegi bezala; datuen katalogoaren grafo osoa kargatzen du, eta SPARQL kontsulta-gune bat ematen du horretan oinarrituta.
Linked Data API: Epimorphics-en ELDA izenekoan ezarrita; RESTful API delakoa ematen du, eta atebide gisa dihardu SPARQL kontsulta-gunearen gainean.

Iturri-kodea

Bi baldintza teknologiko zailenak betetzeko ezarri diren soluzioak aipatzen dira hurrena:

Federatzailea: CKAN aplikazioaren luzapen gisa garatua, aldi berean oinarri hartuta ckanext-harvest federazio-motorra.
Eleanitza: Drupal eduki-kudeatzailerako soluzioa, nabigazio-arkitektura errepikatzen duena hizkuntza guztietan eta bide ematen duena haietan guztietan barrena simetrikoki nabigatzeko, AA irisgarritasun-mailari eutsiz betiere.

Proiektuaren iturri-kodea GitHub webgunean dago eskuragarri. CKAN aplikaziorako garatu diren luzapen guztiak argitaratu dira, baita Drupal kudeatzailearen contrib moduluak, features eta theme ere.