Altuben baso-igel jauzkariaren presentzia joan den mendeko 50eko hamarkadan dokumentatu zen, Arabako Iruraiz, Zurbano eta Gopegi kokapenetan egindako aipuekin batera (Eusko Jaurlaritza, 2002). Arabako, Bizkaiko eta Gipuzkoako Ornodun Kontinentalen Atlasean Altubeko putzuetan (Eusko Jaurlaritza, 1985) zegoela baieztatu zen. 2001. urtean, EAEn katalogatutako espezieen kudeaketa-planen zirriborroak idaztearen esparruan, Altubeko putzuak berriro aztertu ziren, eta horien presentzia ohikotzat jotzen da (Eusko Jaurlaritza, 2002. Ekos Estudios Ambientales). Aranzadi Zientzia Elkarteak eta Euskal Herriko Unibertsitateak markagailu genetikoak erabiliz egindako ikerketen arabera, Altubeko Rana dalmatinaren populazioa Sakanakoarekin eta Arabako Lautadakoarekin parekatzen da (Sarasola, V. et al. 2009), horrela kudeaketa unitate bat osatuz. 2006. urtean 2005eko neguan Nerbioi Garaian antzemandako baso-igel jauzkariaren populazioen prospekzioa, azterketak eta jarraipena egiten hasi ginen. 2007an Altubeko putzuen lehen prospekzioa egin genuen (Corral et al., 2009), bigarren laginketa 2010ean eta hirugarren laginketa 2012an.
