Que facemos

As accións de sensibilización teñen como obxectivo incentivar a apertura de datos de calidade e fomentar a súa reutilización para o desenvolvemento de servizos avanzados baseados en datos.

Os obxectivos que se perseguen son os seguintes:

• Fomentar a interacción entre os actores do ecosistema de datos abertos, tanto a nivel nacional como internacional.
• Concienciar sobre o valor dos datos públicos e da súa reutilización, especialmente nos sectores onde a innovación baseada en datos é un elemento clave.
• Orientar ós publicadores e reutilizadores nas mellores prácticas para asegurar o éxito das súas actuacións baseadas en datos.
• Identificar e difundir modelos de negocio de empresas reutilizadoras, casos de éxito etc. para favorecer a extrapolación de prácticas exitosas.
• Revalorizar o esforzo que os empregados públicos realizan en poñer ó dispor tódolos datos que se xeran froito da súa actividade.
• Situar a datos.gob.es como líder de referencia na difusión de coñecemento sobre aspectos que teñen que ver coa economía do dato e a reutilización de datos públicos.

Para acadar estes obxectivos, desenvólvense diversas actuacións:

• A través da plataforma datos.gob.es, publícanse noticias de actualidade, novidades sobre a innovación e os datos, proxectos destacados de empresas reutilizadoras, guías de referencia e informes ligados ás novas tendencias/desafíos no mundo dos datos.
• Participación en encontros, conferencias e mesas, tanto organizados polo equipo de datos.gob.es como por outras entidades.
• Organización de sesións de sensibilización e formación, propias ou en colaboración con outras institucións.
• Difusión de novidades e avances nacionais e internacionais ligados a datos, a través dos perfís  en redes sociais LinkedIn, X (@datosgob) e Instagram (datosgob).

O equipo de datos.gob.es realiza un seguimento constante da actividade realizada con datos abertos en España, compartindo información a través de diferentes canles:

• Particípase en cuestionarios e estudos internacionais que ofrecen unha visión global do estado da apertura e reutilización de datos públicos en España.
• O Mapa das iniciativas de datos abertos en España permite consultar as iniciativas activas, as súas características e acceder ós seus respectivos espazos web.
• Mantense actualizado o Catálogo de aplicacións e un Catálogo de empresas; ambos recollen exemplos de solucións e servizos baseados en datos, reflectindo a diversidade e dinamismo do sector.
• En colaboración co Observatorio Nacional das Telecomunicacións e da Sociedade de Información (ONTSI) analízanse as empresas que reutilizan información do sector público, xa sexa como actividade principal ou como liña de negocio específica.

A cooperación a nivel nacional é esencial para lograr un maior impacto e cohesión nas políticas de apertura e reutilización de datos públicos. Para iso:

• Trabállase coas Comunidades Autónomas e entidades locais a través de mecanismos establecidos, como conferencias sectoriais e grupos de traballo.
• Créanse grupos de cooperación informais que promoven a reutilización de información pública en función de intereses comúns do sector público e privado.
• Formalízanse acordos bilaterais con entidades clave; os resultados intégranse en datos.gob.es.
• Poténciase a colaboración co sector privado mediante grupos de traballo consultivos, orientados a maximizar o impacto da apertura de datos.

No seu labor de cooperación internacional, o equipo datos.gob.es busca contribuír coa experiencia na definición de políticas e estratexias internacionais. Neste ámbito:

• Particípase en foros como o Public Sector Information Group da Comisión Europea, o grupo do Open Government Data da OCDE, os foros técnicos SEMIC e os grupos de traballo do European Data Portal.

A regulación é un piar fundamental para garantir unha apertura eficaz e sostible da información do sector público. Neste sentido, o equipo de datos.gob.es ofrece as súas achegas ás propostas normativas de carácter nacional e internacional dirixidas a facilitar o acceso a datos públicos de calidade, priorizando aqueles de alto valor. Entre outras, aténdese a consultas públicas dirixidas á definición de:

• Normas técnicas ligadas a datos do Esquema Nacional de Interoperabilidade ou ás normas UNE.
• Leis e reais decretos nacionais, especialmente relacionados coa transposición da regulación europea.
• Directivas da Unión Europea.

O Catálogo Nacional, integrado en datos.gob.es, constitúe o núcleo da plataforma, e preséntase como:

• Punto único de acceso ós datos abertos que publica a administración pública española.
• Ferramenta de mellora da visibilidade e acceso a catálogos autonómicos e locais, entre outros.
• Canle de comunicación co portal de datos da Unión Europea. 

Ademais, ofrécese un servizo continuo de soporte a publicadores e usuarios.

A innovación é un eixe estratéxico para maximizar o impacto da apertura de datos. Datos.gob.es impulsa a creación de contidos e o desenvolvemento de actuacións innovadoras mediante:

• Publicación de contidos no blog de innovación elaborados por expertos de recoñecido prestixio no mundo dos datos.
• Exercicios paso a paso de ciencia de datos baseados nas últimas tendencias.
• Organización de Desafíos Aporta, competicións abertas de ideas e solucións baseadas en datos.