Arrain hiruarantza (Gasterosteus gymnurus) Fauna eta Flora Espezie Mehatxatuen Euskal Katalogoan (167/1996 Dekretua, uztailaren 9koa, Eusko Jaurlaritzarena) zaurgarrien kategorian katalogatutako taxoi bat da. Bestalde, Bizkaiak espeziea kudeatzeko plan bat dauka, eta, bertan, espeziearentzat interes berezia duten eremuak zehazten dira; horietako bi Gobela eta Asua ibaiak dira. Hain zuzen ere, Gobela ibaiaren ibilguan garrantzi handiko obrak egin ziren duela urte batzuk, eta aldaketa sakonak eragin zituzten ingurunean. Ondorioz, arrain hiruarantzaren aleak erreskatatu behar izan ziren, obren fasean hil ez zitezen. Beste jarduketa bat izan zen erreskatatutako arrain horiek Asua ibaira lekualdatzea, Gobelatik oso gertu dagoen arroa. Obrak amaitu zirenetik lau urte igaro ondoren, bereziki garrantzitsua eta egokia zen interes bereziko bi eremuetan katalogatutako espezie horren egungo egoera ezagutzea. Horrela, arrantza elektrikoa erabiliz, 2020ko martxoan hainbat tarte miatu ziren bi ibai horietan: lau laginketa-estazio Gobela ibaian (obren fasean kaltetutako eremuan) eta bi estazio Asua ibaian (obretan erreskatatutako hiruarantzak askatu ziren tartean). Gobela ibaian egindako laginketetan 8 espezie ezberdin harrapatu ziren: arrain hiruarantza (Gasterosteus gymnurus), gobioa (Gobio lozanoi), ezkailua (Phoxinus bigerri), loina txikia (Parachondrostoma miegii), aingira (Anguilla anguilla), gambusia (Gambusia holbrooki), mendi-barboa (Luciobarbus graellsii) eta platija (Platichtys flesus). Asua ibaian 6 izan ziren antzemandako espezieak: gobioa (Gobio lozanoi), ezkailua (Phoxinus bigerri), loina txikia (Parachondrostoma miegii), lotxa (Barbatula quignardi), aingira (Anguilla anguilla) eta amuarraina (Salmo trutta). Egiaztatu da arrain hiruarantzak birkolonizatu egin duela obrek eragindako Gobela ibaiaren zati osoa, eta dentsitate handienak lortu dira uretako landaredia oparoena den zatian, eta, beraz, habitata naturalagoa eta, ustez, egokiagoa den eremuan. Ibai horretako bi estaziotan, espeziearen dentsitatea handiagoa da faunaren aurreko erreskate-lanetan lortutakoa baino; beste bietan, berriz, dentsitatea jaitsi egin da. Azkenik, nabarmendu behar da ez dela arrain hiruarantzarik harrapatu Asua ibaian aztertutako bi estazioetan, eta, beraz, esan daiteke ubide horretan espeziearen aklimatazioa eta kolonizazioa baliogabeak izan direla lekualdaketak egin ondoren.
