Euskadiko lehorreko habitaten klima arriskua

Eusko Jaurlaritzaren Trantsizio Energetikorako eta Klima Aldaketarako 2021-2024 Planaren barruko proiektua da (Eusko Jaurlaritza, 2021), eta bere 15 ekimen enblematikoetako bat da "Neutraltasun klimatikoa bultzatzen duen Natura 2000 Sare erresiliente bat sustatzea EAEn", lurraldearen erresilientzia areagotzen laguntzeko eta, bide batez, lurraldearen neutraltasunerako bidea errazteko. 2017an, "Natura 2000 Sareak klima aldaketaren aurrean duen kalteberatasuna eta horri zuzendutako egokitzapena, EAEn" proiektua hasi zen, Eusko Jaurlaritzak sustatzen dituen I+G KLIMATEK proiektuen esparruan (klima aldaketara egokitzeko berrikuntza eta demostrazio proiektuak). Ordura arte, ez zen azterketa espezifikorik egin eskualde mailan, klima aldaketak EAEko biodibertsitatean duen eraginari buruz. Beraz, klima arriskua kalkulatzeari ekin zitzaion ikuspegi ekosistemiko batetik, habitatetan oinarrituta eta jakinda espezieak beren habitataren menpekoak direla eta, horregatik, hurbilketa horrek aukera emango lukeela klima arriskua eskualde ikuspegitik aztertzeko, habitat guztiak zenbateraino egonkorrak diren ebaluatzeko eta natura ondarearen kudeaketan lehentasunak ezartzen laguntzeko.Arrisku klimatikoaren metodologia hasieratik garatu behar izan zen klima aldaketara egokitzen erreferentziakoak diren erakundeen gomendioak aplikatuz, hala nola Klima Aldaketari buruzko Gobernuarteko Taldearenak (IPCC, 2014). Proiektu honen berrikuntza nagusia izan zen datu geoespazialetan oinarritutako metodologia kuantitatibo bat garatzea, EAEko lehorreko habitaten klima arriskua ebaluatzeko, EAErako eskualdekatutako agertoki klimatikoetan oinarrituta (RCP 8,5 eta 2071-2100 aldia) (Ihobe, 2017). Erreferentziazko kartografia eta oinarriko mapak GeoEuskadin (Euskadiko Datu Espazialen Azpiegitura) dagoen informaziotik elikatzen dira.Lan hori 2 urtez egin zen, eta natura ondarearen kudeaketan adituak diren pertsonek osatutako jarraipen batzorde batek parte hartu zuen, metodologiaren urratsak kontrastatuz eta adostuz. Deskribapen zehatza dokumentu espezifiko honetan kontsulta daiteke: "Euskadiko lehorreko habitaten klima arriskua kalkulatzeko metodologia. Natura 2000 Sareko aplikazioa" (Ihobe, 2021). Lehorreko 40 habitat, Batasunaren Intereseko 27 habitat (Habitat eta Hegaztien Zuzentarauen arabera) eta Eskualdearen Intereseko 13 habitat (EUNIS sailkapenaren arabera) ebaluatu ziren. Habitat horiek EAEn okupatzen duten azalera osoaren %97 dira, eta Natura 2000 Sareko azaleraren %98. Beraz, ebaluazioen emaitzak eskualdeko egoeraren adierazgarritzat joko lirateke.